Эмгекте кыргыз профессионалдык адабиятынын тарыхында, өзгөчө проза жанрында өзүнүн татыктуу орду бар, көрүнүктүү жазуучу, агартуучу, публицист Аман Саспаев менен боордош түрк элинин таанымал жазуучусу, дипломат, коомдук жана саясий ишмер Мемдух Шевкет Эсендалдын аңгемелери салыштырма-типологиялык негизде талдоого алынып, тема системалуу түрдө кылдат изилденген. Аталган чебер жазуучулардын аңгемелеринин салыштыруу жолу менен терең изилдениши ошол эле убакта кыргыз адабияты жана түрк адабиятынын аңгеме жанрындагы жетишкендиктерин, кемчиликтерин, окшоштуктарын жана айырмачылыктарын аныктап, алардын башкы себептерин баамдап, тактап алууга чоң өбөлгө түзгөн. Боордош түрк элинин ушунчалык бай жана тамыры терең адабияты менен байланыштуу маселелерди изилдөө, чыгармаларын кыргыз тилине оодаруу иштеринин Кыргызстанда ар кандай тарыхый, саясий себептерден улам эми гана жандана баштагандыгын эске алганда, бул эмгектин мааниси, темасынын актуалдуулугу тууралуу ашыкча кеп кылуунун зарылчылыгы жок. Эмгек адабият илиминин маселелери менен алектенген, кыргыз-түрк адабиятынын тарыхына, алардын өнүгүү эволюциясына, аңгеме жанрына кызыккан бардык окурмандарга арналат.
